2026-yil 8–12-aprel kunlari Samarqand davlat tibbiyot universitetida yosh psixiatrlar va narkologlarning III Samarqand bahorgi maktabi bo‘lib o‘tdi. Tadbir O‘zbekiston psixiatrlar assotsiatsiyasi, Respublika ixtisoslashtirilgan ruhiy salomatlik ilmiy-amaliy tibbiyot markazi, Samarqand davlat tibbiyot universiteti va Toshkent davlat tibbiyot universiteti ishtirokida, O‘zbekiston Respublikasi Sog‘liqni saqlash vazirligi hamda Jahon psixiatriya assotsiatsiyasi ko‘magida tashkil etildi.
Maktabda O‘zbekiston, Qozog‘iston, Qirg‘iziston va Tojikistondan 142 nafar yosh psixiatr va narkolog qatnashdi. Ta’lim dasturiga Belarus, Germaniya, Italiya, Qozog‘iston, Qirg‘iziston, Rossiya, AQSH, Fransiya va O‘zbekistondan 45 nafardan ortiq o‘qituvchi va ekspert jalb qilindi.
Dastur ma’ruzalar, mahorat darslari, klinik holatlar tahlili, ilmiy munozaralar va kasbiy muloqot tadbirlarini qamrab oldi. Yosh mutaxassislarning klinik fikrlashi, tadqiqot ko‘nikmalari va xalqaro hamkorligini rivojlantirishga alohida e’tibor qaratildi.